Markaðsvirði Twitter orðið milljarður dollara

Markaðsverðmæti félagslegu netsíðunnar Twitter er nú orðið einn milljarður dollara eða tæplega 124 milljarðar kr. Þetta þykir nokkuð gott í ljósi þess að Twitter er enn í sömu skrifstofum í San Francisco þar félagið hóf starfsemi sína 2006 og starfsfólkið telur ekki nema um 50 manns.

Samkvæmt frásögn í TechCrunch hefur forstjóri Twitter, Evan Williams, gengið frá nýrri fjármögnun til félagsins upp á 50 milljónir dollara og liggur það til grundvallar fyrrgreindu verðmati.

Fyrr í ár fékk Twitter 35 milljónir dollara í nýju fjármagni frá Benchmark Capital og Institutional Venture Partners og þá var markaðsverðmæti félagsins metið á 250 milljónir dollara. Hið nýja fjármagn kemur frá Insight Venture Partners í New York.

Twitter hefur áhrif langt út fyrir landamæri Bandaríkjanna. Þannig má nefna að þegar mótmælin stóðu sem hæst gegn forsetakosningunum í Íran fyrr í ár notuðu mótmælendur Twitter óspart til að koma upplýsingum á framfæri og samræma aðgerðir sínar.