Evrópski seðlabankinn byggir upp risavaxinn varasjóð

Evrópski seðlabankinn (ECB) er nú að byggja upp risavaxinn varasjóð sem hægt verður að greiða úr milljarða evra á innan 24 klukkustunda ef þörf er á.

Samkvæmt frétt um málið á business.dk er markmiðið með sjóðnum einkum að forða þjóðum innan Evrópubandalagsins frá þjóðargjaldþroti.

Í fyrstu er ætlunin að nota sjóðinn til að bjarga Írlandi frá þessum örlögum og ef til vill Grikklandi síðar meir. Fari þessar þjóðir í gjaldþrot er talin hætta á að slíkt myndi hafa mjög alvarlegar afleiðingar fyrir ESB og raunar hætta á að bandalagið myndi liðast í sundur við slíkt.

Það er þýski stjórnmálamaðurinn Otto Bernhardt, meðlimur CDU flokks Angelu Markel kanslara Þýskalands, sem hefur greint frá þessum áætlunum. Hann segir í samtali við Reuters að útgangspunkturinn sé að engin þjóð innan myntsamstarfs ESB megi komast í þrot.

Sem fyrr segir eru Írland og Grikkland talin í mikilli hættu á að komast í þrot. Nefnt er að munurinn á vöxtum á ríkisskuldabréfum Þýskalands og Grikklands er nú eitt prósentustig en munurinn var lengi 0,25%.

Og hvað Írland varðar hefur því landi ítrekað verið líkt við Ísland og að Írum bíði sömu örlög og íslensku þjóðarinnar.