Skipta átti Kaupþingi í Lúxemborg í tvö félög

Samkvæmt þeirri áætlun sem lá fyrir um framtíð Kaupþings í Lúxemborg var ætlunin að skipta bankanum upp í tvö félög undir nöfnunum New Bank og Securitization Company.

Í frétt um málið á Reuters segir að New Bank átti að verða viðskiptabanki sem hefði haldið starfsfólki Kaupþings áfram ásamt 350 milljónum evra eða rúmlega 50 milljörðum kr. í lausafé. Securitization Company aftur á móti átti að halda utan um einkabankastarfsemina og fyrirtækjalán Kaupþings ásamt kröfum bankans.

Eins og fram kom í frétt hér á vefnum fyrr í dag hafnaði meirihluti þeirra banka sem eiga kröfur á hendur Kaupþingi í Lúxemborg þessari áætlun.

Fjármálaráðherra Lúxemborgar, Luc Frieden hefur farið fram á það við þessa banka og fjárfestingarsjóð þann sem ætlaði að kaupa starfsemi Kaupþings að þeir endurskoði afstöðu sína. Hann vill að sjóðurinn leggi fleiri spil á borðið ef það mætti verða til þess að bankarnir létu af andstöðu sinni við áætlunina.

Fram kom hjá ráðherranum að stjórnvöld í Lúxemborg myndu ekki leggja meira í púkkið en þau hefðu þegar gert.

Frieden segir að enn sé of snemmt að segja til um bætur til handa innistæðueigendum í Kaupþingi en þeirra á meðal eru nokkur þúsund Belgar.

„Ég hef ekki svarið við þessu í augnablikinu," segir Frieden. „Við erum núna að einbeita okkur að því að finna lausn svo bankinn geti starfað áfram. Ef bankinn starfar munu allir fá sitt fé að fullu greitt."

Endurskipulagningu Kaupþings í Lúxemborg verður að vera lokið fyrir 8. apríl ef forða á bankanum frá gjaldþroti.