Kreppan í Austur-Evrópu veldur Actavis erfiðleikum

Fjármálakreppan í Austur-Evrópu og miðhluta álfunnar veldur Actacvis erfiðleikum en um 40% af sölu félagsins er á þessum svæðum.

Fjallað er um málið á Bloomberg-fréttaveitunni. Þar er haft eftir Milan Todorovic aðstoðarforstjóra Actavis í austur- og miðhluta Evrópu að Actavis eigi í erfiðleikum sökum þess hve gjaldmiðlar þjóða á þessum svæðum hafa fallið mikið á undanförnum mánuðum.

„Þar sem við gerum upp í evrum er mikil óvissa til staðar. Þetta er nokkuð sem við höfum enga stjórn yfir," segir Todorovic.

Actavis hefur brugðist við ástandinu með því að setja ný lyf á markaðina í Rússlandi og Úkraníu sem eru tvö af þremur stærstu markaðssvæðum félagsins. Og í Búlgaríu, þar sem Actavis er stærsta lyfjafyrirtækið, reiknar félagið með að halda stöðu sinni á markaðinum.

Rúblan hefur lækkað um 19% gagnvart evrunni undanfarna 12 mánuði og gjaldmiðill Úkraníu hefur lækkað um 22% á sama tíma. Þetta veldur samsvarandi minnkun á tekjum Actavis í þessum löndum í evrum talið. Gjaldmiðill Búlgaríu hefur hinsvegar verið tengdur evrunni síðan 1999.

Actavis reiknar með að sala félagsins í fyrra hafi numið 1,7 milljarði evra eða vel yfir 200 milljarða kr..