Fjármálaráðherra Lúxemborgar beitir sér í þágu Kaupþings

Stjórnendur Kaupþings í Lúxemborg reyna nú allt hvað þeir geta til að varna því að bankinn fari í þrot eftir að lánadrottnar höfnuðu áætlun um endurskipulagningu. Fjármálaráðherra Lúxemborgar hyggst beita sér í málinu.

Í desember var undirritað samkomulag milli yfirvalda í Lúxemborg og fjárfestingarsjóðs í eigu stjórnvalda í Lýbíu um endurskipulagningu bankans en þetta samkomulag var háð ýmsum skilyrðum, þar á meðal samþykki lánardrottna bankans. 17 af 25 alþjóðlegum bönkum sem eiga kröfur á bankann höfnuðu samkomulaginu í atkvæðagreiðslu sem fór fram í gær.

Greiðslustöðvun bankans rennur út 8. apríl en umsjónarmenn greiðslustöðvunarinnar ásamt yfirvöldum munu leggja fram nýja áætlun í dag. Vonast er til að hægt verði að funda með kröfuhöfum síðar í vikunni. Málið hefur fengið töluverða umfjöllun í fjölmiðlum í Lúxemborg í dag.

Eitt af megin markmiðum með endurskipulagningu bankans er að tryggja að um 22 þúsund manns í Lúxemborg, Belgíu og Sviss fái innistæður sínar greiddar að fullu. Fjármálaráðherra Lúxemborgar hefur sagt í fjölmiðlum þar ytra í dag að það sé óskiljanlegt að kröfuhafarnir hafi hafnað áætluninni og hyggst hann beita sér í málinu svo það fái farsælan endi.