Erfitt fram undan hjá Ryanair þrátt fyrir hagnað

Ryanair jók hagnað sinn um hvorki meira né minna en 550 prósent milli ársfjórðunga sem verður að teljast þokkalegt miðað við árferði. Michael O'Leary, forstjóri félagsins, þakkar hagnaðinn lægra eldsneytisverði og fjölgun farþega.

Hann er þó langt frá því að vera bjartsýnn þegar hann lítur til framtíðar og segir geysierfiða tíma fram undan í flugrekstri. Nú megi ekki gefa þumlung eftir í baráttunni þrátt fyrir jákvæðar tölur eftir einn ársfjórðung.

O'Leary spáir hörðu verðstríði milli flugfélaga enda bítist þau nú um æ færri farþega í kreppunni þegar fleiri og fleiri hyggi á ferðalög innanlands eða bara alls engin ferðalög. Hann segir Ryanair, sem er írskt félag, hafa staðið vel áður en lægðin skall á og ekki skemmi það að um lággjaldafélag sé að ræða þar sem væntanlegir flugfarþegar leiti nú til þeirra í síauknum mæli.

Hins vegar séu skattar og gjöld á flugfélög, til dæmis í Bretlandi, að ríða mörgum þeirra á slig og stjórnendur Ryanair fundi nær daglega um nýjar sparnaðarleiðir. Þegar hafi verið rætt um að láta farþegana standa í flugi en það sem verði líklegast næst fyrir valinu hjá Ryanair er að rukka fyrir salernisnotkun.