ILVA í Danmörku og Svíþjóð selt til IDdesign

Lagerinn, sem m.a. rekur verslanir Rúmfatalagersins á Íslandi, hefur gert samning um sölu á húsgagnaverslununum ILVA í Danmörku og Svíþjóð til danska félagsins IDdesign.

Í tilkynningu um málið segir að samningurinn sé gerður með nokkrum fyrirvörum, meðal annars um samþykki samkeppnisyfirvalda í Danmörku. Ný stórverslun ILVA í Korputorgi fylgdi ekki með kaupunum og verður rekin áfram með óbreyttu sniði.

ILVA og IDEmøbler munu áfram halda sínum sérkennum en hyggjast ná hagræðingu á öðrum sviðum m.a. í innkaupum og yfirstjórn. Velta ILVA á síðasta ári var um 700 milljónir danskra króna og gert er ráð fyrir að velta sameinaðs félags verði um 2 milljarðar danskra króna á þessu ári eða rúmlega 40 milljörðum kr.

IDEmøbler og ILVA munu vera í sterkri stöðu til að mæta erfiðu árferði á danska húsgagnamarkaðinum á næstu misserum.

Lagerinn mun eftir sem áður halda áfram rekstri ILVA á Íslandi og mun ásamt IDdesign jafnframt kanna möguleika á samstarfi og opnun verslana í ákveðnum löndum utan Evrópu.

Markmið Lagersins með sölunni er að einfalda rekstur móðurfélagsins og einbeita sér að starfsemi Rúmfatalagersins, en fyrir utan íslensku verslanirnar rekur félagið m.a. 40 verslanir undir nafni JYSK í Kanada, 26 í Eystrasaltslöndunum, ásamt verslunum í Búlgaríu, Rúmeníu og Færeyjum.