Icesave eigandi sem á 10 milljónir inni gleymir kröfu

Eigandi Icesave-reiknings í Bretlandi sem á 50.000 pund eða rúmlega 10 milljónir kr. hefur enn ekki gert kröfu um að fá innistæðu sína borgaða. Geri hann slíkt ekki fyrir mánaðarmótin er krafan töpuð.

Greint er frá þessu í blaðinu Telegraph en eins og kunnugt er af fréttum eiga um 1.500 eigendur Icesave-reikninga í Bretlandi enn eftir að gera kröfur um að fá innistæður sínar endurgreiddar. Í flestum tilvika er um smáupphæðir að ræða.

Bresk stjórnvöld tryggðu á sínum tíma allar innistæður á Icesave upp að 50.000 pundum og hafa allir af þeim tæplega 300.000 Bretum sem áttu fé á þessum reikningum fengið það endurgreitt, það er fyrir utan fyrrgreinda 1.500 sem ekki hafa enn gert kröfur um endurgreiðslur.

Tryggingasjóður innistæðueigenda í Bretlandi hefur hingað til greitt út 3,9 milljarða punda til þessa hóps. Upphæðin í heild nemur 4,56 milljörðum punda en það sem á milli skilur, 660 milljón pund, var á föstum langtímareikningum og verða endurgreidd þegar tímatakmörkunum er náð.