Allur hagnaður norska olíusjóðsins frá 1998 er horfinn

Á morgun leggur norski olíusjóðurinn fram versta ársuppgjör í sögu sinni. Tapið nemur stjarnfræðilegum upphæðum eða um 800 milljörðum norskra kr. sem samsvarar 12.800 milljörðum kr.

Þetta þýðir að allur hagnaður sjóðsins frá árinu 1998 er horfinn. Til að setja tapið í samhengi má nefna að fjárlög norska ríkisins í heild, þar með talinn sérstakur efnahagspakki, verða um 870 milljarðar norskra kr. í ár.

Tapið þýðir högg upp á 380 þúsund norskar kr. fyrir hvert af 2,1 milljónum heimilanna í Noregi eða um 6 milljónum kr.

Í umfjöllun um málið á vefsíðunni e24.no segir að málefni sjóðsins verða aðeins verri því vitað er að á fyrstu mánuðum þessa árs hélt tapið áfram að aukast af fjárfestingum sjóðsins.

Það er einkum gífurlegt tap á fjárfestingum í hlutabréfum sem er orsök þessarar slöku afkomu sjóðsins í fyrra. Og þetta skýrist af því að á sama tíma og hlutabréfamarkaðir heimsins voru á niðurleið samþykkti norska Stórþingið að sjóðurinn mætti auka fjárfestingar sínar í hlutabréfum úr 40% og í 60%.

Og markaðurinn með skuldabréf hefur ekki síður reynst sjóðnum erfiður á síðasta ári vegna bankahruns og fjármálakreppu víða um heiminn.