CSA skilar rúmlega 13 milljarða tapi

Tékkneska ríkisflugfélagið (CSA) tapaði tæplega 103 milljónum dollara eða rúmlega 13 milljörðum kr. á fyrstu sex mánuðum ársins. Sem kunnugt er af fréttum hefur Icelandair áhuga á því að kaupa flugfélagið í samvinnu við tékkneska félagið Unimex.

Samkvæmt frétt um málið á Reuters er tap CSA á fyrrgreindu tímabili nær tvöfalt hærra en sérfræðingar gerðu ráð fyrir. Samkvæm t upplýsingum sem tékknesk vefsíða hefur upp úr skjölum frá CSA minnkaði salan hjá félaginu um 13% miðað við sama tímabil í fyrra þar sem miðaverð lækkaði og farþegum fækkaði um 9,7%.

Reiknað er með að CSA greini frá uppgjöri sínu fyrir fyrstu sex mánuði ársins á morgun, miðvikudag.

Eins og fram hefur komið í fréttum hefur félagið Travel Service, í eigu Icelandair, og tékkneska félagið Unimex sameinast um tilboð í CSA. Eru þessi félög þau einu sem eftir eru í tilboðsferlinu en Air France hætti við að bjóða í CSA fyrr í sumar. Lokatilboð Travel Service og Unimex á að liggja fyrir í lok næsta mánaðar.