Mun Mourinho henda sex mönnum út?

Jose Mourinho, þjálfari Inter, mun ekki sitja auðum höndum í sumar heldur mun hann halda ótrauður áfram við að byggja upp stórveldi hjá Inter.

Liður í því er að hreinsa til í sumar og er talið að hann ætli að losa sig við allt að sex leikmenn,

Hann ku hafa fengið leyfi hjá yfirmönnum sínum til þess að hreinsa út og skoða nýja valmöguleika. Sjálfur vill Mourinho hafa 25 manna leikmannahóp næsta vetur.

Talið er að einn af þeim mönnum sem fái að fjúka í sumar sé Frakkinn Patrick Vieira. Einnig mun Amantino Mancini fá að leita sér að nýju félagi.

Julio Cruz virðist einnig vera á útleið en samningur hans við félagið er að renna út. Sömu sögu er að segja af David Suazo, Nicolas Burdisso og Nelson Rivas.