Pato fær ekki að fara frá Milan

Adriano Galliani, varaforseti AC Milan, segir að Milan muni ekki selja neina aðra stjörnu frá félaginu. Það hafi verið nóg að selja Kaká.

Stuðningsmenn Milan hafa verið í vandræðum með koma Cheeriosinu niður á morgnana enda blöðin uppfull af fréttum um að Andrea Pirlo og Alexandre Pato séu hugsanlega á förum frá félaginu.

Í ljósi þessara frétta er Galliani að gera sitt besta til þess að róa óánægjuöldurnar.

„Ég get sagt að allar stóru stjörnurnar verða áfram hjá Milan. Það er 99,9 prósent öruggt," sagði Galliani.

„Pato? Það er 100 prósent að hann verður áfram hjá Milan."

Antonio Cassano hefur verið orðaður við félagið upp á síðkastið.