Kaladze verður áfram hjá Milan

Georgíumaðurinn Kakha Kaladze verður áfram í herbúðum AC Milan eftir því sem umboðsmaður hans heldur fram.

Kaladze hefur lítið fengið að spila undir stjórn Leonardo og hefur verið sagður vilja finna sér nýtt félag sem allra fyrst.

„Milan hefur ekki efni á því að missa jafn sterkan varnarmann og Kaladze," sagði umboðsmaðurinn í samtali við ítalska fjölmiðla. „Nú þegar Thiago Silva er meiddur mun Kaladze aftur gegna lykilhlutverki hjá Milan."

Engu að síðar fékk Kaladze ekki tækifæri um helgina þegar að Milan mætti Palermo þó svo að Thiago Silva hafi verið frá vegna meiðsla.

Kaladze hefur þó sjálfur sagt að hann vilji vera áfram hjá félaginu. Hann er samningsbundinn því út næsta tímabil.