Þrjú tungl á braut um jörðu

Vísindamenn Geimferðastofnunar Bandaríkjanna telja að jörðin hafi upphaflega átt sér þrjú tungl.

Það er nokkuð viðtekinn sannleikur að tunglið eina og sanna hafi myndast þegar pláneta á stærð við Mars rakst á jörðina fyrir 4.5 milljörðum ára.

Við áreksturinn þeyttist svo mikið efnismagn út í geiminn að það safnaðist aftur saman vegna eigin aðdráttarafls og myndaði tunglið. Í milljónir ára var tunglið glóandi meðan bráðið grjótið frá árekstrinum kólnaði.

Vísindamenn NASA telja að í byrjun hafi efnið sem þeyttist út í geiminn safnast saman í tvö önnur en þó miklu minni tungl. Þau hafi verið á braut um jörðu í um 100 milljónir ára. Aðdráttarafl annarra pláneta í sólkerfinu hafi smámsaman togað þau af braut.

Þau hafi endað með því að krassa inn í jörðina eða tunglið, eða þá borist út í geiminn.