Elísabet tekur við Kristianstad

Elísabet Gunnarsdóttir, fyrrum þjálfari Vals, hefur verið ráðinn nýr þjálfari sænska úrvalsdeildarfélagsins Kristianstad eftir því sem fram kemur í staðardagblaðinu Norra Skåne í dag.

Erla Steina Arnardóttir leikur með Kristianstad og segir blaðið að einnig muni Sigurður Jónsson, þjálfari Djurgården, hafa mælt með Elísabetu en á endanum stóð valið á milli hennar og Anders Svahn sem er þjálfari Nosaby.

Þá veltir blaðið einnig þeim möguleika fyrir sér að Margrét Lára Viðarsdóttir fylgi í kjölfarið enda hefur hún starfað náið með Elísabetu undanfarin ár. Þær hafa báðar orðið Íslandsmeistarar þrjú ár í röð með Val.