Hannes missti meðvitund í leik

Hannes Þ. Sigurðsson missti meðvitund eftir að hafa verið tæklaður illa í æfingaleik Viking og Stabæk í dag.

Hannes náði þó fljótt aftur meðvitund en þurfti að fara af velli. Talið er að hann hafi snúið illa upp á öxlina á sér en ekki er vitað hversu alvarleg meiðslin eru.

Þetta eru slæmar fréttir fyrir Viking því báðir framherjar liðsins, Hannes og Peter Ijeh, eiga nú við meiðsli að stríða.

Liðin gerðu 1-1 jafntefli í leiknum en Viking vann 6-4 eftir vítaspyrnukeppni.

Þá skoraði Garðar Jóhannsson eitt marka Fredrikstad í 3-1 sigri liðsins á Strömsgodset í æfingaleik í dag.