Haraldur gæti fengið tækifærið á morgun

Haraldur Freyr Guðmundsson hefur ekkert fengið að spila með Álasundi á núverandi tímabili í norsku úrvalsdeildinni en það gæti breyst á morgun.

Benjamin Kibebe og Amund Skiri hafa verið miðvarðarpar Álasunds á leiktíðinni en sá fyrrnefndi fékk að líta rauða spjaldið um helgina og verður því í leikbanni á morugn er liðið mætir Fredrikstad.

En Haraldur hefur undanfarnar vikur þurft að glíma við meiðsli í mjöðm en telur að hann gæti orðið klár í slaginn á morgun. Hann náði að æfa eðlilega í gær.

„Æfingin gekk mjög vel og ef að þjálfarinn óskar eftir því að ég spili á morgun reikna ég með því að ég geti það," sagði Haraldur í samtali við norska fjölmiðla.