Mesta hrun síðan í kreppunni miklu

Öfgakennt hrun markaða á þessu ári endurspeglast glöggt í yfirliti yfir árssveiflu markaðsvísitölu Standard og Poor‘s í Bandaríkjunum, en þar eru til óslitin markaðsgögn allt frá árinu 1825.

Í samanburðinum kemur fram að lækkun á einu ári hefur aðeins tvisvar áður verið ámóta og á þessu ári, en það var í heimskreppunni 1931 og svo 1937. Þessi ár nemur árslækkun vísitölunnar 30 til 50 prósentum. Fall á húsnæðismörkuðum, lausafjárkrísa og samdráttur um heim allan gera hins vegar að árið 2008 er með verstu árum frá upphafi.

Í upphafi ársins var S&P 500 vísitalan 1.468,4 stig. Lágpunktur þessa árs var svo 20. nóvember síðastliðinn þegar hún fór í 806,9 stig og hafði þá lækkað um 45 prósent frá ársbyrjun. Núna undir blálok desember nam lækkunin um 41 prósenti og vísitalan stóð í um 870 stigum.

Af þeim 183 árum sem mælingin nær til hefur árssveiflan í flestum tilvikum verið hækkun upp á núll til 10 prósent, eða í 45 ár. Þar á eftir kemur hækkun á bilinu tíu til tuttugu prósent, en sú hefur verið raunin í 36 árum tímabilsins. Lækkun frá núlli og í tíu prósent hefur svo orðið 29 ár af tímanum.

Ef einvörðungu er horft til skiptingarinnar á milli hækkunar og lækkunar kemur í ljós að markaðir hafa frá 1825 hækkað oftar en þeir hafa lækkað, í 129 skipti á móti 55 lækkunarárum. Markaðir hafa sem sagt hækkað í sjö ár af hverjum tíu, þótt oftast hafi hækkunin verið hófleg. Hækkun frá 50 og upp í 60 prósent innan árs hefur ekki átt sér stað í nema 10 ár af þessum 184, en það eru um 5,4 prósent heildartímans. Sambærileg lækkun hefur átt sér stað þrisvar, en það eru um 1,6 prósent tímabilsins frá 1825.- óká