Hannes fékk rautt í tapi Sundsvall

Hannes Þ. Sigurðsson fékk að líta rauða spjaldið þegar Sundsvall tapaði 1-2 fyrir Hammarby í sænsku úrvalsdeildinni í kvöld. Hannes fékk rautt fyrir mótmæli við dómarann eftir að Hammarby skoraði jöfnunarmark á 58. mínútu.

Hammarby náði að nýta sér liðsmuninn og skoraði sigurmarkið undir blálok leiksins. Auk Hannesar voru Sverrir Garðarsson og Ari Freyr Skúlason báðir í byrjunarliði Sundsvall.

Þá vann Halmstad 3-1 sigur á Helsingborg í kvöld en Ólafur Ingi Skúlason kom inn sem varamaður á 70. mínútu hjá Helsingborg.

Sundsvall er í 13. sæti af 16 liðum, tveimur stigum frá fallsæti. Helsingborg er í þriðja sæti, sjö stigum á eftir toppliði Kalmar.