Hrifin af ítölskum mat

Hönnuðurinn Elísabet Ásberg er hrifin af Ítalíu. Hún hélt á matreiðslunámskeið í Toskana síðasta vetur og eldar mikið af ítölskum mat heima við.

„Það er eitthvað sem togar mig alltaf aftur þangað. Núna var ég bara að ferðast um Ítalíu en ég hef líka farið á listanámskeið í Flórens og matreiðslunámskeið í Toskana,“ segir Elísabet Ásberg hönnuður, sem hannar allt frá veggskúlptúrum til skartgripa á verkstæði sínu við Hverfisgötu.

„Ég og vinkona mín fórum á helgarnámskeið í nóvember í fyrra. Við fundum það bara á netinu og ákváðum að drífa okkur. Það var haldið í litlum kastala í Toskana, þar sem við elduðum fullt af ítölskum mat og allir borðuðu saman,“ útskýrir Elísabet, sem segist mæla með slíkum námskeiðum.

„Þetta er eina matreiðslunámskeiðið sem ég hef farið á, en alls ekki það síðasta. Ég myndi meira að segja vilja fara aftur þangað. Við lærðum að gera ferskt pasta og búa allt til frá grunni, fórum út í jurtagarð og kynntumst jurtunum. Þetta var alveg frábært,“ segir Elísabet.

Í anda þess eldar Elísabet mikið af ítölskum mat heima við og hefur alveg lagt þurrkað pasta á hilluna. „Ég er bara í fersku pasta núna, því maður finnur sko algjörlega mun á því,“ segir hún.

Rétturinn hér að neðan er sköpunarverk Elísabetar. „Ég er að hugsa um að kalla hann Ástfanginn kjúkling – af pasta,“ segir hún og hlær.

Námskeiðið sem Elísabet fór á má kynna sér á síðunni www.cookingintuscany.net og hönnun Elísabetar má sjá á asberg-design.com.

Aðferð:

Innihald í maríneringu skorið smátt og bringurnar látnar marínerast í tvo tíma. Þær eru þá bakaðar í ofni í eldföstu móti.

Á meðan er maríneringin hituð á pönnu og smjörklípu bætt út í. Þegar kjúklingurinn er tilbúinn er svolitlu af vökvanum sem af honum kom bætt út í maríneringuna.

Pastað sett á disk, kjúklingurinn í miðjuna og maríneringu hellt yfir. Rífið parmesanost yfir og berið fram.sunna@frettabladid.is