Forseti kúrdahéraðanna í Norður-Írak neitaði í dag að hitta Condoleezzu Rice, utanríkisráðherra Bandaríkjanna. Hún kom í óvænta heimsókn til Íraks í dag.
Á dagskrá hennar var meðal annars að hitta kúrdaleiðtogann Masoud Barzani.
Ástæðan fyrir því að Barzani neitaði að eiga með henni fund er sú að hann telur að Bandaríkjamenn sjái í gegnum fingur sér við Tyrki sem gerðu loftárásir á þorp í Norður-Írak um síðustu helgi.
Tyrkir voru að eltast við skæruliða Kúrdiska verkamannaflokksins svokallaða. Liðsmenn hans hafa myrt fjölmarga Tyrki í árásum yfir landamærin á síðustu mánuðum.
Talsmaður Barzanis sagði við fréttamenn að Bandaríkjamenn stjórnuðu allri flugumferð í Norður-Írak.
Það væri því óhugsandi að Tyrkir hefðu gert þar loftárásir án þeirra samþykkis.
