Ætlum ekki að selja Hannes

Uwe Rösler, þjálfari norska úrvalsdeildarliðsins Viking, segir að engar áætlanir séu um að selja Hannes Þ. Sigurðsson frá liðinu.

Tromsö gerði á mánudaginn tilboð í Hannes sem var umsvifalaust hafnað.

Sjálfur sagði Hannes í samtali við Aftenposten að hann vildi ekkert tjá sig um tilboðið.

„Ég á þrjú ár eftir af samningi mínum við Viking og held mér við hann," sagði Hannes.

Rösler sagði að það byggi mikið í Hannesi. „Hannes býr yfir hæfileikum sem við viljum halda í okkar liði. Þar fyrir utan býr hann yfir mikilli reynslu þrátt fyrir ungan aldur. Það eru engar áætlanir um að selja neina leikmenn en allir leikmenn eru vissulega falir fyrir ákveðið verð."

En Rösler undirstrikaði að Hannes ætti sinn stað í framtíðaráætlunum sínum. „Við viljum halda Hannesi. Við teljum að það búi mikið í honum."