Notaði rafmagns hundaól við að nauðga dætrum sínum

Heimilisfaðir í Tennessee hefur verið handtekinn fyrir að nota rafmagnaðar hundaólar við að nauðga tveim táningsdætrum sínum um margra ára skeið.

Með því að ýta á takka á fjarstýringu gaf hann telpunum rafstuð í gegnum hálsólarnar sem hann lét þær bera öllum stundum. Þessu beitti hann óspart ef þær gerðu ekki allt sem hann vildi.

Nauðganirnar hófust þegar telpurnar voru um þrettán ára og héldu áfram í að minnsta kosti fimm ár. Faðirinn nauðgaði þeim bæði í hjólhýsi fjölskyldunnar og úti í skógi.

Associated Press fréttastofan segir að móðirin hafi verið ákærð fyrir illa meðferð á börnum þar sem hún vissi um hundaólarnar. Hinsvegar er ekki talið að hún hafi vitað um nauðganirnar.

Associated Press veit nöfn foreldranna en birtir þau ekki, til þess að vernda stúlkurnar.

Faðirinn er 37 ára gamall en kona hans 35 ára. Dæturnar tvær sem hann nauðgaði eru frá fyrra hjónabandi.

Eldri telpan sem nú er 18 ára sagði loks frá þegar hún óttaðist að faðirinn færi að snúa sér að litlu systur þeirra sem er orðin ellefu ára gömul.