Stefán fyrirliði Bröndby

Stefán Gíslason verður fyrirliði Bröndby í stórleiknum gegn FCK á sunnudag í dönsku úrvalsdeildinni. Stefán mun leysa Per Nielsen af sem er meiddur. Þetta er í fyrsta sinn sem Stefán setur upp fyrirliðabindið fyrir lið sitt.

"Það er mikill heiður fyrir mig að vera fyrirliði sérstaklega í stórliði eins og Bröndby," segir Stefán í samtali á heimasíðu liðsins. "Mér líður betur og betur með liðinu og tel mig standa fyrir mínu á vellinum."

Stefán segir að hann hlakki til leiksins en um er að ræða derby-leik þessara tveggja stórliða í Kaupmannahöfn. Aðdáendum þeirra hefur oftar en ekki lent saman eftir þessa leiki í blóðugum slagsmálum eftir leikina.