Hershöfðingi rekinn eftir morð á rússneskum hermanni

Varnarmálaráðherra Rússlands hefur rekið hershöfðingja sem stjórnaði herstöð þar sem drukknir foringjar börðu ungan óbreyttan hermann til bana. Ill meðferð á ungum hermönnum er landlæg í rússneska hernum. Fjölmörg dæmi eru um að þeir lifi hana ekki af. Átján mánaða herskylda er í Rússlandi og ungir menn gera allt sem þeir geta til þess að komast hjá henni.

Á síðasta ári þurfti að taka báða fætur og kynfæri af ungum hermanni sem hafði verið misþyrmt. Það eru bæði foringjar og eldri hermenn sem níðast á nýliðunum. Þykir það jafnvel einhverskonar karlmennskupróf ef nýliðarnir komast í gegnum þjálfun sína án þess að gefast upp.

Þessi meðferð hefur viðgengist í áratugi, en eftir fall Sovétríkjanna byrjuðu að birtast um hana fréttir í fjölmiðlum og foreldrar nýliðanna hafa farið að láta til sín taka. Putin forseti hefur auk þess gert sér dælt við herinn og vill veg hans sem mestan.