Byrjað að grafa eftir námumönnunum

Björgunarmenn í Utah fylki í Bandaríkjunum eru nú búnir að bora víða holu ofan í námuna þar sem talið er að sex námumenn séu fastir eftir að hrun varð í námunni síðastliðinn mánudag. Ætlunin er að láta videomyndavél og hljóðnema síga niður í holuna og reyna að sjá hvort þeir eru á lífi. Ekkert hefur heyrst frá mönnunum síðan óhappið varð.

Það mun taka björgunarmennina fjóra til fimm daga að grafa sig niður í göngin til þess að ná mönnunum út. Ef þeir eru enn á lífi er hægt sjá þeim fyrir vatni, mat og súrefni niður um holuna. Eigandi námunnar heldur því fram að jarðskjálfti hafi valdið hruninu. Jarðfræðingar draga það í efa og segja að skjálfti á mælum þeirra hafi orðið þegar náman hrundi saman.