Mun fleiri karlar en konur teknir fyrir ölvunarakstur

Fjórtán ökumenn voru teknir fyrir ölvunarakstur í umdæmi lögreglunnar á höfuðborgarsvæðinu um helgina. Þetta voru þrettán karlar og ein kona á fertugsaldri sem alloft hefur komið við sögu lögreglunnar áður. Hún var einnig tekin fyrir ölvunarakstur í síðustu viku. Fjórir karlanna eru undir tvítugu, fimm eru á þrítugsaldri, þrír á fertugsaldri og einn á fimmtugsaldri. Tveir ökumannanna höfðu aldrei öðlast ökuréttindi og fimm höfðu þegar verið sviptir þeim. Einn var jafnframt á stolnum bíl.

Lögreglan stöðvaði að auki fjóra ökumenn um helgina sem höfðu aldrei ölast ökuréttindi. Einn þeirra er 16 ára. Hann var á bifhjóli með farþega og var hvorugur þeirra með hjálm.