Enn leitað að kajakræðurunum

Hátt á annað hundrað björgunarsveitarmenn úr 20 björgunarsveitum, skip og bátar frá Slysavarnafélaginu Landsbjörgu og þyrla Landhelgisgæslunnar hafa frá því snemma í gærkvöldi leitað tveggja erlendra kajakræðara, sem héldu frá Garðskaga á laugardagsmorgun og ætluðu til Snæfellsness.

Sex björgunarskip Slysavarnafélagsins Landsbjargar ásamt níu harðbotna slöngubátum og 18 minni bátum hafa verið notaðir við leitina og tæplega 200 björgunarsveitarmenn hafa leitað bæði á sjó, Faxaflóa og vestari hluta Breiðafjarðar, og á landi, frá Búðum á Snæfellsnesi að Hellissandi.

Leitin hefur beinst að vestanverðu Nesinu og allt norður að Bjargtöngum, samkvæmt vísbendingum frá erlendu símafyrirtæki sem segir að kveikt hafi verið á gervihnattasíma fólksins klukkan fjögur í gær og aftur klukkan níu í gærkvöldi, án þess þó að hringt hafi verið úr honum. Gengnar hafa verið fjörur á stóru svæði og leitað á bátum undan ströndum.

Leitin verður endurskipulögð þegar líður á morguninn, enda margir björgunarmenn orðnir þreyttir. Þá verður Fokker Landhelgisgæslunnar sendur til leitar og varðskip sent á leitarsvæðið. Ekkert hefur spurst til fólksins eftir að það lagði af stað, en það er vant svona siglingum og vel búið.