Komu hjálpargögnum í búðirnar

Hjálparsamtökum tókst í gær að koma hjálpargögnum inn Nahr el-Bared flóttamannabúðirnar í Líbanon. Það er í fyrsta sinn frá því að sókn líbanska hersins gegn herskáum múslimum, sem halda þar til, hófst í síðasta mánuði. Um hundrað manns hafa fallið í átökunum aðallega almennir borgarar.

Á myndbandi sem íbúi í flóttamannabúðunum gerði fyrir nokkrum dögum og fyrst var sýnt opinberlega í gær, má sjá þá miklu eyðileggingu sem orðið hefur á þessum griðarstað Palestínumanna. Daglegt líf er lamað. Talið er að rúmlega hundrað manns hafi fallið í átökum líbanska hersins og liðsmanna Fatah al-Islam samtakanna síðustu vikur, flestir almennir borgarar. Þetta eru verstu innanlandsátök í Líbanon frá lokum 15 ára borgarastyrjaldar 1990. Áður en til átaka kom tuttugasta maí síðastliðinn voru þrjátíu og eitt þúsund flóttamenn búsettir í búðunum, flestir eru nú flúnir en um fimm þúsund almennir borgarar búa þar þó enn.

Líbanski herinn herti enn á árásum sínum á búðirnar í gær en markmiðið mun að fella eða fæla á brott alla liðsmenn Fatah al-Islam, samtaka sem sögð eru nátengd al-Kaída hryðjuverkasamtökunum. Einhverjir liðsmenn gáfust upp fyrir hermönnum í gær en það er ekki í samræmi við hegðun flestra úr samtökunum sem svara árásum hers af hörku.

Hjálpar- og mannúðarsamtök hafa lýst yfir áhyggjum vegna ástandsins. Talsmaður Rauða krossins sagði í gær að tekist hefði að koma hjálpargögnum í búðirnar í fyrsta sinn frá því átök hófust. Auk þess hafi tólf almennir borgarar verið fluttir á brott, þar á meðal ólétt kona og nokkrir illa særðir. Fjörutíu og fimm íbúar í búðunum hafa því verið fluttir á brott síðan í fyrradag.

Bandaríkjamenn hafa flutt skotfæri og byrgðir til líbanska hersins síðustu daga til hjálpar í baráttunni við Fatah al-Islam. Tengslin við Sýrlendinga og al-Kaída án efa hvati. Ráðamenn í Damaskus segjast þó ekkert hafa með samtökin að gera.

Óttast margir að átök brjótist út víðar í Líbanon er íbúar í hinum ellefu flóttamannabúðum Palestínumanna í landinu eru æfir vegna árása hersins.