Keyrði undir áhrifum amfetamíns, metamfetamíns og kókaíns

Lögreglan á Akranesi stöðvaði ökumann á fertugsaldri á Akrafjallsvegi um áttaleytið í gærkvöldi. Ökumaður reyndist sviptur ökuréttindum ævilangt með dómi frá árinu 2005. Þvagsýni bílstjórans reyndist jákvætt fyrir amfetamíni, metamfetamíni og kókaíni. Nokkuð af lyfjum fundust á ökumanninum en engin ólögleg fíkniefni. Málið er í rannsókn.

Hálftíma síðar var rétt rösklega tvítugur ökuníðingur stöðvaður á Kjalarnesi. Hann var á 185 km hraða og var sviptur prófinu á staðnum. Bíður hans nú mikil fjársekt. Aðeins nokkrum mínútum síðar var annar ökumaður stöðvaður á Kjalarnesi á 137 km hraða.