Slógust um þýfi

Lögregla var kölluð á Hverfisgötu laust eftir miðnætti þar sem tveir menn slógust heiftarlega. Þeir eru báðir þekktir síbrotamenn, meðal annars fyrir að brjótast inn í bíla. Það hafði einmitt annar gert en ekki áttað sig á inn í hvaða bíl hann var að brjótast.

Hinn þjófurinn átti hann og varði eigur sínar af þvílíkri hörku að flytja þurfti hinn á slysadeild til aðhlynningar. Síðan voru þeir báðir vistaðir í fangageymslum og fyrir liggur að kanna hvernig bíleigandanum áskotnaðist þau auðæfi, sem freistuðu hins til innbrotsins.