Treystum velferðina og útrýmum fátækt , kjörorð dagsins

Treystum velferðina og útrýmum fátækt voru kjörorð dagsins í tilefni af fyrsta maí. Forseti ASÍ segir ólíðandi að fimm þúsund börn séu undir fátækramörkum hér á landi og segir nauðsynlegt að leiðrétta kjör eldri borgara. Fjölmargir tóku þátt í kröfugöngu í tilefni dagsins.

Fólk kom saman klukkan eitt við Hlemm í dag og hélt af stað í kröfugöngu við öflugan lúðraþyt Lúðrasveita Verkalýðsins og Svans klukkan hálf tvö. Fólk á öllum aldri tók þátt í göngunni og yngri kynslóðinni fannst ekki síður skemmtilegt að vera í kröfugöngu.

Grétar Þorsteinsson forseti ASÍ gagnrýndi í ávarpi sínu í dag, stöðu velferðarmála í landinu, launamisrétti kynjanna og lagði áherslu á allir hefðu jafnan rétt til menntunar. Hann sagði ólíðandi að fimmþúsund börn á Íslandi væru undir fátækramörkum. Grétar gagnrýndi lífeyriskerfið og sagði eldri borgara þurfa að berjast fyrir kjörum sínum.

Hljómsveitin Baggalútur og Gospelkór Reykjavíkur léku síðan fyrir fundargesti við góðar undirtektir.