Veigar Páll: Þetta var dásamlegt

Veigar Páll Gunnarsson er í skýjunum með að hafa náð að opna markareikning sinn í norsku úrvalsdeildinni í knattspyrnu, en hann skoraði bæði mörk Stabæk í fræknum sigri liðsins á Rosenborg í gærkvöldi. "Tilfinningin er dásamleg," sagði Veigar við norska fjölmiðla þegar hann var spurður að því hvernig það hefði verið að tryggja liði sínu sigur á norska stórveldinu.

Veigar er umtalaður í norskum fjölmiðlum sem "matchvinner" eða sá leikmaður sem sigraði leikinn fyrir Stabæk. Rosenborg hafði komist yfir í leiknum en Veigar Páll jafnaði metin fljótlega í síðari hálfleik þegar skammt var liðið af síðari hálfleik. 10 mínútum fyrir leikslok fékk Stabæk síðan vítaspyrnu sem Veigar Páll tók og gerði landsliðsmaðurinn engin mistök á vítapunktinum.

"Þetta er svo dásamlegt. Ef ég man rétt hef ég aldrei skorað áður á móti Rosenborg svo að það gerir mörkin og sigurinn enn sætari," sagði Veigar Páll brosandi í samtali við Verdens Gang í Noregi.