Muuga hugsanlega á flot í kvöld

Hugsanlega verður reynt að draga Wilson Muuga á flot á háflóði klukkan hálf sjö í kvöld. Það veltur á því hvort menn telji að búið sé að styrkja skrokk skipsins nægilega. Ef eigendur skipsins telja útséð um að það sé skynsamlegt að reyna í kvöld verður reynt annað hvort á morgun eða á fimmtudag.

Ákvörðun verður að líkindum tekin fyrir hádegi í dag. Starfsmenn útgerðarinnar hafa unnið undanfarnar vikur að því að styrkja skrokk skipsins nægilega til þess að hægt sé að draga það á flot.