Mæðgin í vélsleðaslysi

Kona á fimmtugsaldri og 11 ára gamall sonur hennar lentu í vélsleðaslysi á Grenjárdal ofan Grenivíkur laust fyrir klukkan tvö í dag. Mæðginin misstu stjórn á sleðanum valt yfir þau. Ræstar voru út Björgunarsveitirnar Ægir á Grenivík og Súlur á Akureyri sem og sjúkraflutningamenn frá Akureyri og lögregla.

Talsvert var af fólki á vettvangi þegar slysið varð og kom það mæðginunum til aðstoðar og hlúðu að þeim þar til björgunaraðilar komu.

Þau voru flutt með snjótroðara frá Kaldbaksferðum af slysstað niður til Grenivíkur þar sem sjúkrabifreið beið þeirra og flutti á Fjórðungssjúkrahúsið á Akureyri.

Konan var með áverka á mjöðm og drengurinn á fæti. Björgunaraðgerðir gengu greiðlega fyrir sig og hin slösuðu komin í sjúkrabifreið laust eftir kl. 15:00.