Ítölsk matargerð í blóðinu

Myndlistarkonan Ásdís Spanó eldar forláta pastarétti, enda rennur ítalskt blóð í æðum hennar.

„Pabbi er ítalskur og við höfum búið úti, einu sinni þegar ég var mjög ung og svo aftur þegar ég var ellefu ára," útskýrði Ásdís, sem segir ítalska matargerð því eðlilega vera í uppáhaldi hjá fjölskyldunni. „Pabbi er algjör eðalkokkur. Hann hefur alltaf verið voða mikið í eldhúsinu og er enn þá. Uppskriftin er einmitt að hluta til frá honum, en svona aðeins í minni útfærslu," sagði Ásdís.

Ítalir gera greinarmun á fjölmörgum tegundum pasta. „Það fer eftir því hvaðan pastað kemur, og hvort það er gert með eggjum, til dæmis, hvernig það bragðast. Svo fer það eftir sósunum hvernig pasta maður notar, það eru miklar pælingar á bak við það," útskýrði Ásdís.

„Spaghetti er helst notað með skelfiskpasta eða bolognese, penne og rigatoni er frekar með túnfiski eða rauðri sósu," sagði hún. Ásdís hefur þar að auki þreifað sig áfram með spelt- og heilhveitipasta, og segist hrifin af því í dag. Hún segir Íslendinga einnig vera orðna ansi lærða í pastamenningunni. „Fólk er farið að spá mikið í þetta - og farið að sleppa tómatsósunni, blessunarlega," sagði hún og hló.

Ef Ítalía er ríkjandi í eldhúsi Ásdísar er Ísland í forgrunni í myndlist hennar, að minnsta kosti á sýningunni sem hún opnaði nýlega í Gallerí 100° í húsi Orkuveitu Reykjavíkur. „Hún heitir Rof. Þetta eru ákveðnar pælingar um þau útrænu öfl sem eru hérna á Íslandi, og hvernig náttúran veðrar jarðveginn," útskýrði Ásdís, sem vann eingöngu með gráa, hvíta og svarta tóna. „Það er mikill kraftur í þessum myndum, þetta er svona jarðfræðipæling," sagði hún og hló við. Sýningin stendur yfir til 5. ágúst.