Ferðast um landið

Tónlistarmennirnir KK og Maggi Eiríks verða á faraldsfæti um landið á næstunni til að kynna nýjustu plötu sína Langferðalög. Tónleikaferðin hefst á Borg í Grímsnesi á fimmtudag og byrja tónleikarnir kl. 20.30. Kvöldið eftir leika þeir félagar í Duushúsum í Keflavík og á laugardag liggur leiðin í Bíóhöllina á Akranesi. Á sunnudagseftirmiðdaginn verða síðan stórir fjölskyldutónleikar í Fjölskyldu- og húsdýragarðinum í Reykjavík.

Fimmtudaginn 26. júlí liggur leiðin vestur á firði og verða tónleikar haldnir í Edinborgarhúsinu á Ísafirði. Laugardaginn 28. júlí verða þeir á Græna hattinum á Akureyri og ferðinni lýkur með fjölskyldutónleikum í félagsheimilinu Ljósheimum við Sauðárkrók.