Níu ára strákur kynnir myndasögubók

„Ég hef samið myndasögur frá því ég var sex ára,“ segir Hugi Garðarsson myndasöguhöfundur sem mætti á Fréttablaðið til að kynna myndasögubók sína, Jóa gulrót og brækur réttlætisins.

„Ég hef samið sögur um alls konar Jóa. Þeir eru allir eitthvað sem er hægt að borða.“

Í sögunni segir frá Jóa gulrót sem berst við gríðarstórt vélmenni sem brjálaður vísindamaður með minnimáttarkennd hefur búið til. Vélmennið er óvart stillt á vonsku en Jóa gulrót tekst að laga mistökin og gera það gott. Vélmennið er í nærbuxum og vitnar undirtitill sögunnar, brækur réttlætisins, til þeirra.

Hugi er sniðugur níu ára strákur í Háteigsskóla sem hefur samið heilmargar myndasögur síðustu þrjú ár. Hann stefnir á að vera áfram myndasöguhöfundur þegar hann er orðinn stærri. Hugi les mikið af myndasögum en það er engin sérstök í uppáhaldi. Hann er ekki byrjaður að selja sögur sínar en þó er aldrei að vita nema fólk rekist á hann á röltinu einhvers staðar í sumar með bækur sínar til sölu. -