Met-skilnaður Eddu Björgvins

„Já, þetta er nefnilega svo mikið met. Þetta er bara að verða eins og besti farsi,“ segir Edda Björgvinsdóttir, leikkonan dáða og snjalla, í samtali við Fréttablaðið. Í banastuði eins og svo oft.

Enda má Edda vera ánægð með sig og sína og sitt góða gengi á fjölunum því leikritið Alveg brilljant skilnaður hefur nú gengið von úr viti fyrir fullu Borgarleikhúsi. Verið í gangi í þrjú leikár og leikritið sýnt 150 sinnum. Sem Edda segir að sé nefnilega svo mikið met. Eða þannig. Nánast. Afar sjaldgæft er að leiksýningar nái þessum sýningafjölda og það þó litið sé allt til upphafs atvinnuleikhúss á Íslandi.

Edda hefur að sjálfsögðu skýringar á velgengninni á reiðum höndum.

„Sko, ég held að það sé vegna þess að hver einasta manneskja sem kemur á sýninguna lætur boð út ganga. Allir þekkja þessar erfiðu tilfinningar og svívirðingarnar sem hún lætur fjúka um fyrrverandi manninn sinn, sektarkenndina, það þekkja þetta allir. Og senda alla vini sína á sýninguna. Ég hef verið með frá ellilífeyrisþegum og niður í unglinga. Og þeir hafa virkilega notið þess að vera á sýningunni.“

Notið svívirðinganna?

„Jaaaaahhh, já.“

Leikurinn er á gamansömum nótum enda þótt honum megi á köflum lýsa sem harmskoplegum og greinir frá ofur hvunndagslegri miðaldra konu, Ástu, en eiginmaður hennar til þrjátíu ára yfirgefur hana til að taka saman við yngri konu. Leikstjóri er Þórhildur Þorleifsdóttir og þýðandi og höfundur íslenskrar leikgerðar er Gísli Rúnar Jónsson. Í kvöld mun svo Edda sýna Alveg brilljant skilnað í síðasta skipti.