Brynhildur segir upp hjá Þjóðleikhúsinu

Brynhildur Guðjónsdóttir hefur sagt upp störfum hjá Þjóðleikhúsinu eftir farsælan feril í átta ár. Þetta staðfesti hún í samtali við Fréttablaðið. „Það er einhvern veginn andstætt eðli mínu að vera ríkisstarfsmaður,“ segir Brynhildur en tekur skýrt fram að engum hurðum hafi verið skellt þegar hún afhenti Þjóðleikhússtjóra uppsögnina.

„Allt hefur sinn enda og það var komin tími breytinga hjá mér,“ útskýrir Brynhildur sem telur kröftum sína betur varið á öðruvísi hátt. „Að starfa innan Þjóðleikhússins var bara ekki lengur það sem ég vildi og frá með fyrsta mars verð ég lausráðinn leikari,“ segir Brynhildur.

Brynhildur sagði uppsögnina þó ekki útiloka frekari verkefni í Þjóðleikhúsinu. „Ég er ekki að setjast í helgan stein en ég fór að kíkja á ferilsskrána og var ánægð með hana. Ég vildi einfaldlega fara að horfa í aðrar áttir,“ segir hún.

Leikkonan klárar þau verkefni sem fyrir liggja hjá Þjóðleikhúsinu en hún undirbýr nú af krafti enska uppfærslu á Pétri Gaut sem frumsýnd verður í Barbican Center. „Þar sem ég var einmitt í skóla fyrir níu árum,“ segir Brynhildur og auðheyrt að hana hlakki mikið til að koma aftur á fornar slóðir. Þá leikur hún eitt aðalhlutverkanna í Sitji guðs englum sem sýnd er fyrir fullu húsi og tekur þátt í franskri leiksýningu sem sett verður upp í mars. Hvað önnur verkefni varðaði vildi Brynhildur ekkert tjá sig um en sagði þau skýrast á næstu misserum. „Fæst orð bera minnstu ábyrgð,“ sagði hún.