R.E.M., Van Halen og Patti Smith valin

Hljómsveitirnar R.E.M., Van Halen, The Ronettes, Grandmaster Flash and the Furious Five og söngkonan Patti Smith verða innvígð inn í Frægðarhöll rokksins í New York hinn 12. mars.

Sex hundruð manns úr tónlistarbransanum sáu um valið. Til að eiga möguleika á að komast í Frægðarhöllina þurftu listamennirnir að hafa gefið út sína fyrstu smáskífu eða plötu fyrir að minnsta kosti 25 árum.

„R.E.M. og sérstaklega ég sjálfur eigum mjög erfitt með að horfa til baka,“ sagði söngvarinn Michael Stipe.

„Við sem hljómsveit lítum stöðugt fram á við og þess vegna er það frábært að einhver, sérstaklega þó Frægðarhöll rokksins, horfi til baka og kunni að meta það sem við höfum gert. Það er mikill heiður að þeir skuli hafa hugsað til okkar,“ sagði hann.

R.E.M. vakti mikla athygli með sinni fyrstu plötu, Murmur, árið 1983 þar sem sérstæður stíllinn var áberandi. Í framhaldinu varð sveitin ein sú vinsælasta í heimi með lögum á borð við Losing My Relegion og Everybody Hurts.

Stipe segir að vinkona sín, Patti Smith, sem hélt tónleika hér á landi í fyrra, hafi hringt í sig og óskað sér til hamingju. Sagðist hann hafa ákveðið að hefja tónlistarferil eftir að hann heyrði tónlist Smith fyrst á áttunda áratugnum. „Það var frábært að geta óskað henni til hamingju á móti.“