Mikilvægur sigur Sheffield United

Sheffield United tryggði sér þrjú afar dýrmæt stig í botnbaráttu ensku úrvalsdeildarinnar í knattspyrnu í kvöld með 1-0 útisigri á Watford. Það var Danny Webber, fyrrum leikmaður Watford, sem skoraði sigurmark United rétt fyrir leikslok. Markið var nokkuð umdeilt, því Webber þótti hafa verið rangstæður þegar hann skoraði, en sigurinn var engu að síður verðskuldaður hjá United.

Sheffield United átti tvö skot stöng í síðari hálfleiknum og var öllu sterkari aðilinn í leiknum heilt yfir. Þetta er þriðja viðureign liðanna tveggja í röð þar sem útiliðið vinnur sigur, en þau voru sem kunnugt er í 1. deildinni á síðasta ári.