Rannsaka lifnaðarhætti hvala

Vísindamennirnir eru hér á vegum Alþjóða dýraverndunarsjóðsins sem eru alþjóðlegur sjóður sem vinnur að aukinni velferð villtra og taminna dýra um allan heim. Sjóðurinn hefur um nokkra áratuga skeið barist fyrir verndun sjávarspendýra og er vísindaleg þekking þeirra viðurkennd um allan heim. Með rannsóknum sínum vill sjóðurinn reyna að auka skilning manna á sjávarspendýrum. Vísindahópurinn hefur á þessum tveimur mánuðum sem rannsóknir hans hafa staðið yfir hér á Íslandi safnað saman gögnum á ýmsan hátt.

Þegar úrvinnslu gagna er lokið munu niðurstöðurnar verða sendar til Hafrannsóknarstofnunar Íslands en auk þess hefur hópurinn hýst nema um borð í bátnum sem hafa fengið að vinna við hlið hans og öðlast þannig reynslu við rannsóknir á hvölum á hafi úti.