Sviðsmynd nýjustu Bond myndarinnar gereyðilagðist

Sviðsmynd nýrrar kvikmyndar um James Bond, Casino Royale, gereyðilagðist í eldsvoða í Pinewood Studios kvikmyndaverinu í Buckinghamskíri á Englandi í morgun. Þegar tökum var að ljúka gaus upp mikill eldur og varð sviðsmyndin fljótt alelda. Þak kvikmyndaversins er að mestu hrunið. Ekki er vitað um slys á fólki.

Að minnsta kosti fimmtíu slökkviliðsmenn á átta slökkvibílum börðust við eldinn þegar mest var. Eldtungur teygðu sig tugi metra í átt til himins og mikill reykur lagðist yfir nágrennið.

Myndir um njósnara hennar hátignar, 007, hafa oftar en ekki verið teknar upp í Pinewood Studios kvikmyndaverinu í Buckinghamskíri. Kvikmyndaverið var reist árið 1935 og var fyrsta Bond myndin, Dr. No tekin þar upp árið 1962.