Rocky slær frá sér

Þrátt fyrir hrakspár, háð og spott getur Sylvester Stallone vel við unað með gengi sjöttu myndarinnar um boxarann sjónumhrygga Rocky Balboa, sem ekki aðeins laðar fjöldann að heldur fær fína dóma ofan í kaupið.

Myndin er í þriðja sæti á lista yfir aðsóknarmestu myndir í Bandaríkjunum; halaði inn rúmar 900 milljónir króna fyrstu sýningarhelgina en heildartekjur frá því að myndin var frumsýnd á miðvikudag fyrir viku eru þegar orðnar 1,6 milljarðar.

Gagnrýnendur eru heilt á litið ánægðir með Stallone og segja Rocky aldrei hafa verið í betra formi síðan 1976 þegar fyrsta myndin um hann kom út. Ef til vill vinnur mótbyrinn með honum því eins og gagnrýnandi Premire Magazine kemst að orði virðist sem Stallone hafi eitthvað að sanna og gerir það með glæsibrag. Gagnrýnandi Eclipse Magasine tekur í sama streng og segir að Stallone hafi tekist hið ómögulega, að glæða nýju lífi í steindauða persónu sem áhorfendum stóð á sama um.

Á heimasíðu IMDB fær myndin 7,9 í meðaleinkunn sem má teljast prýðileg einkunn og á Rotten Tomatoes fær hún 77 prósent, sem þykir afbragð á þeim bæ.