Meint fangaflug CIA rannsakað áfram

Þing Evrópuráðsins samþykkti nær einróma í gær að halda skyldi áfram rannsókn á meintum leynilegum fangaflutningum og fangelsum á vegum bandarísku leyniþjónustunnar CIA í lögsögu Evrópuríkja. Franco Frattini, sem fer með dómsmál í framkvæmdastjórn Evrópusambandsins, sló því föstu að menn sem grunaðir hefðu verið um að vera viðriðnir hryðjuverkastarfsemi hefðu verið handteknir og seldir í hendur útsendara Bandaríkjastjórnar í evrópskri lögsögu.

Frattini hvatti til þess að ítarleg rannsókn færi fram í hverju landi á meintu ólöglegu athæfi erlendra útsendara og samsekt stjórnvalda í viðkomandi Evrópuríkjum í hugsanlegum mannréttindabrotum. Fór hann þess jafnframt á leit að reynt yrði að tryggja að erlendir útsend­arar kæmust ekki upp með það framvegis að fremja mann­réttindabrot í Evrópu.

Frattini sagði það vera "staðreynd" að slík tilvik hefðu átt sér stað í evrópskri lögsögu eftir hryðjuverkaárásirnar á Bandaríkin 11. september 2001, en fjöldi þeirra væri óljós. Einnig væri óljóst að hve miklu leyti stjórnvöld í viðkomandi Evrópulöndum hafi verið upplýst um það sem fram fór og að hve miklu leyti þau lögðu hinum erlendu útsendurum lið. Hann sagði það vera á könnu landsyfirvalda að ganga úr skugga um hvað hæft sé í öllum þeim ábendingum sem fram koma um meint mannréttindabrot af hálfu erlendra útsendara í hverju landi fyrir sig.

Í nýlegri skýrslu svissneska þingmannsins Dick Marty, sem unnin var í nafni mannréttinda- og laganefndar Evrópuráðsþingsins, er komist að þeirri niðurstöðu að sterkar vísbendingar séu um að í 14 Evrópulöndum hefðu stjórnvöld gerst meðsek um slík brot. Nýja ályktunin, sem samþykkt var í gær, veitir umboð til að halda þessari rannsókn áfram.

"Það er nauðsynlegt að upplýsa málið til fulls, það vantar ennþá töluvert upp á að stjórnvöld í öllum aðildarríkjum Evrópuráðsins hafi veitt þær upplýsingar sem beðið hefur verið um, til að skýra sinn hlut í málinu. Það eru dæmi um það að mönnum var rænt um hábjartan dag af útsendurum Bandaríkjastjórnar og það er auðvitað ekki líðandi að slíkt sé gert í lögsögu Evrópuríkja," sagði Kristinn H. Gunnarsson alþingismaður, sem var annar tveggja íslenskra þingmanna sem sóttu fundEvrópuráðsþingsins að þessu sinni. Hinn var Birgir Ármannsson. Báðir sögðu þeir að af því að dæma sem fram er komið sé engin ástæða til að ætla að Ísland hafi tengst þessum málum á nokkurn hátt.

Birgir lét þess jafnframt getið að hafa bæri í huga að engar óyggjandi sannanir væru bornar fram í skýrslu Dick Marty, aðeins rök færð fyrir missterkum vísbendingum um að umrædd brot hefðu átt sér stað.