Eþíópíski herinn við landamæri Sómalíu

Sheikh Sharif Sheikh Ahmed, stjórnarmaður Íslömsku dómstólanna, samtaka íslamista í Sómalíu, segir að Eþíópíski herinn hafi farið yfir landamæri Eþíópíu og inn í Sómalíu klukkan átta í gærmorgun.

Háttsettur ráðgjafi forseta Eþíópíu, Bereket Simon, hefur neitað þessu, en staðfesti þó að herinn væri við landamæri þjóðanna. Hann minnti á að Eþíópía hefur fullan rétt til að gæta landamæra sinna, en tjáði sig ekki að öðru leyti.

Eþíópíski herinn hefur áður gripið inn í gang mála í Sómalíu í því skyni að hægja á sigurgöngu íslamista og gegndi lykilhlutverki í myndun bráðabirgðastjórnar 2004. Abdullahi Yusuf, núverandi forseti Sómalíu og fyrrverandi stríðsherra, var þá studdur til valda af Eþíópíumönnum og þykir líklegt að aukinn viðbúnaður Eþíópíu vegna Sómalíu sé til þess að verja bráðabirgðastjórnina fyrir íslamistum, en stjórnin hefur aðsetur í Baidoa. Sharif Sheikh Ahmed aftekur að íslamistar hafi í hyggju að ráðast á Baidoa, en bætti við að ef almenningur bæði um inngrip íslamista, myndu þeir svara kallinu.

Öll spjót standa nú á íslamistum, en velgengni þeirra kemur illa við Bandaríkja- og Eþíópíumenn og hina valdalausu bráðabirgðastjórn Sómalíu. Hins vegar hefur vænkast hagur nokkurra stríðsherra sem hafa fengið aukin fjárframlög frá Bandaríkjunum vegna velgengni íslamista, en Bandaríkjamenn telja íslamista líklega til að vera hlynntir al-Kaída. Tveir stríðsherranna eru þó sagðir hafa flúið land um helgina og með því dregið mátt úr bandalagi stríðsherranna, en þetta bakslag þeirra gæti skýrt afskipti Eþíópíumanna að einhverju leyti.

Íslamistarnir vilja koma á sjaríalögum kóransins, en afneita tengslum við al-Kaída. Þeir segjast eingöngu hafa áhuga á að koma á stöðugleika í landinu, en upplausnarástand hefur verið í Sómalíu síðan 1991. Íslamistarnir þykja vel skipulagðir og hafa lagt undir sig hverja borgina á fætur annarri, oftast við fögnuð almennings. Þeir segja núverandi ríkisstjórn ólögmæta, en því eru Sameinuðu þjóðirnar, Bandaríkin, Evrópusambandið og nágrannaríki Sómalíu ekki sammála.