Menn verða að þekkja sín takmörk
Georg vann á alþjóðlegu móti á Spáni og öðru sæti í keppninni Sterkasta lið í heimi sem hann mætti í Ungverjalandi, ásamt Grétari "Big G" Guðmundssyni. "Þetta veit bara á betra og meira," segir Georg og kveðst vera rétt að byrja. Hann stundaði körfubolta á árum áður og kveðst hafa gutlað við lyftingar með þeim en ekkert byrjað að "rífa í járnin fyrir alvöru" fyrr en fyrir fjórum árum. Ekki skortir hann aðstöðuna þar sem hann á líkamsræktarstöðina Orkuverið í Egilshöll og svo er hann sjúkraþjálfari að mennt þannig að hann kann þetta líka. "Maður reynir að stunda æfingarnar vel og vera eins hrikalegur og hægt er þegar á þarf að halda," segir hann hlæjandi. Hann kveðst fá ráð hjá sér reyndari mönnum um hvernig best sé að haga æfingum og segir Magnús Ver mikinn fróðleiksbrunn. "Magnús er rosalega duglegur að miðla sínum fróðleik og maður er ekki á flæðiskeri staddur hvað það varðar," segir hann. Er ekki hætta á að menn ofgeri líkamanum í svona aflraunum? "Sem sjúkraþjálfari get ég sagt að um leið og íþróttir eru orðnar að keppni þá eru þær varasamar fyrir stoðkerfið. Í keppni vill hver og einn vera bestur og því eru menn alltaf í hættu á að ofgera sjálfum sér. Menn verða því að þekkja sín takmörk," segir Georg. Sjálfur er hann nýkominn af ströngu Norðurlandamóti og kveðst vera með mjaðmaverki og stingi í hnjánum sem hann reiknar með að finna fyrir í einhverja daga enn. "Maður fer eins nálægt þessari óheilbrigðu línu og hægt er en verður þó að halda sig réttu megin við hana."
