Hrefna með fernu fyrir KR

Heil umferð fór fram í Landsbankadeild kvenna í kvöld og varð engin breyting á tveimur efstu sætum deildarinnar. Topplið KR lagði FH, 6-1 þar sem Hrefna Jóhannesdóttir skoraði fernu og eru Vesturbæjarstúlkur efstar með 9 stig eins og Breiðablik sem vann erfiðan útisigur á ÍBV, 1-2. Blikastúlkur léku einum færri í 70 mínútur. Erna Björk Sigurðardóttir og Edda Garðarsdóttir skoruðu mörk Blika en Bryndís Jónasdóttir fyrir heimastúlkur sem verma fjórða sætið með jafnmörg stig og Valur. Íslandsmeistarar Vals rassskelltu nýliða Keflavíkur, 0-9 og lyfta sér upp í 3. sæti deildarinnar með 6 stig. Björk Gunnarsdóttir skoraði mark Stjörnustúlkna sem unnu botnslaginn gegn ÍA, 1-0. ÍA er á botninum án stiga.