Boltar í stað stóla

Æfingaboltar rúlla nú um líkamsræktarstöðvarnar enda nýjasta æðið í heimi heilsuræktar. Krisztina G. Agueda er menntaður íþróttakennari og hefur réttindi til Fit-ball kennslu og þjálfunar, en Fit-ball eru æfingaboltar sem koma frá Ítalíu þar sem heilt æfingakerfi hefur verið smíðað í kringum þá. "Með notkun Fit-ball í æfingum er dregið úr spennu í líkamanum þar sem líkamsþyngdin er studd af boltanum og getur komið í veg fyrir meiðsl á liðamótum, þar sem boltinn hjálpar til við að draga úr álagi á liðamót í æfingum," segir Krisztina sem sjálf notar boltann daglega og hefur meira að segja skipt út stólum á heimili sínu fyrir bolta. "Við sitjum á boltunum heima hjá mér og það er svo miklu betra fyrir skrokkinn en að sitja á stól," segir Krisztina sem vaggar barni sínu í svefn á meðan hún situr sjálf á boltanum. "Allir geta notað þessa bolta og henta sérstaklega vel fyrir þá sem eiga við einhver vandamál að stríða, en einnig ófrískar konur og börn," segir Krisztina. Mikilvægt segir hún þó vera að læra að nota boltann rétt og skiptir máli að sækja tíma til kennara sem hafa réttindi til kennslu, en sjálf stendur hún fyrir námskeiðum fyrir kennara og sjúkraþjálfara. Boltarnir eru ekki dýrir en þeir kosta á bilinu 2.000 til 3.000 krónur og fást í flestum íþróttavöruverslunum. "Þeir kosta mun minna en venjulegur stóll og eru mun betri,"segir Krisztina.